DAVAO CITY – Subling gipahinumduman ang mga nagasaka sa pinakataas nga bukid sa nasud nga mao ang Mount Apo, nga gikinahanglang responsable ug respituhan ang tanang nagpakabuhi sa nahisgutang lugar.
Gipahayag ni DENR-Davao Executive Director Bagani Fidel Evasco, ang nahisgutang bukid ang ubos sa management ug regulasyon sa Protected Area Management Board nga gilangkuban sa mga membro lakip na ang regional executive director sa Department of Environment and Natural Resources Office isip chairman ug advisor sa mga aspetong teknikal.
Kung kahinumduman, nagpagawas ug pamahayag ang DENR Davao region nga mamahimong magpagawas sila ug kamando-an nga serad-an ang Mount Apo sa mga nagasaka niini, sa higayong dili motuman sa mga environmental laws ug health protocols.
Nadeskubrehan sa monitoring team nga wala gituman sa mga hikers ang insaktong paghipos sa basura sa agi-anan ug sa mga campsite, sanitation ug health protocols.
Ginasulat-sulatan usab ang dalan, campsite, ginakulitan ang mga dagkong bato, ang ibabaw nga bahin lakip na ang crater sa bulkan.
