DAVAO CITY –Mipakita karon ug pag-uyon ang pipila ka mga grupo sa mounteering group sa dakbayan sa nahimong lakang karon sa Department of Environment and Natural Resources (DENR) nga dili una pasak-an ang Mt. Apo sulod sa tulo ka bulan sugod sa bulan sa Hunyo hangtud Agosto ning tuig kasamtangan.
Tipik lamang ang maong lakang aron nga makapahulay ug ma-rehabilitate ang bukid gumikan sa pipila ka mga pagpangabuso nga gihimo sa mga trekkers.
Kahinumduman nga nahimong kontrobersiyal ang Mt. Apo sa milabay nga bulan gumikan sa gihimo sa pipila ka mga trekkers sama sa paglabay ug basura, adunay nakitang traces sa paggamit ug ginadili nga druga ug daghanan pa.
Sa milabay nga tuig 2016 dihang nasunog ang pipila ka bahin sa Mt. Apo hinungdan nga usa ka tuig kini nga wala gipasak-an ug gipailalom sa rehabilitasyon.
Laraw sa DENR nga ma-preserba kini ug malikayan ang pagpangabuso.
Samtang temporaryo sab karon nga dili pasak-an ang Mt. Loay sa Sta. Cruz gumikan kay kinahanglan sab nga han-ayon ang pipila ka mga sumbanan ayha subli nga tugtan ang pagsaka sa mga trekkers.
