DAVAO CITY – Patay ang usa ka bana nga gikan naghatod sa iyang asawa dihang natumbahan sa punuan sa kahoy samtang naglawig sa dalan sa Brgy. Road sa Purok 3, Brgy. San Jose, New Corella, Davao del Norte alas 10:00 sa buntag, niining milabay’ng adlaw.
Naila ang biktima nga mao si Mateo Sambayan, 49 anyos, minyo, mag-uuma, molupyo sa Purok 2, Matin-ao, New Cortez, New Corella, Davao Del Norte.
Subay sa report, ang biktima sakay sa gimanehong kolor itom nga Skygo Motorcycle nga adunay plaka nga 9845 YG nga nagsubay sa dalan gikan sa Sitio Sangay, Brgy. Limbaan, New Corella, Davao Del Norte padulong sa ilang panimalay human gihatod ang iyang asawa sa nahisgutang Sitio apan pag-abot sa dapit diin nahitabo ang insidente usa ka dakong punuan sa kahoy’ng Angilan nga nagbarog sa walang bahin sa kilid sa karada ang kalit nga natumba human naigo sa makusog nga haguros sa hangin.
Matud pa nga ang biktima naigo sa pagkatumba sa maong punuan sa kahoy ug naantimano sa ulo niini nga miresulta sa pagkatumba sa gimanehong motorsiklo.
Gidali pagtabang sa mga residente sa dapit ang biktima apan wala makalahutay ug nabugtuan sa iyang gininhawa.
Patay’ng lawas sa biktima gipahiluna sa Twins Funeral Homes nga nahimutang sa Purok 5, Brgy. Poblacion, New Corella, Davao Del Norte.
