Nagpadayon karon ang gipahigayon nga search and rescue operation niining adlawa sa Davao Gulf human sa gikatahong nahanaw nga recreational vessel nga sakay ang 15 ka mga pasahero ug crew members nga gituohang naunlod kagahapon sa hapon sa kadagatan nga bahin sa Davao Occidental.
Una nang nagpaguwa og Notice to Mariners ang Philippine Coast Guard sa Davao Region kagahapong adlawa pinaagi sa pag-awhag sa tanang mga mananagat og mga nagalawig sa kadagatan nga mag-alerto basin adunay makita nga bangka sa maong bahin sa kadagatan.
Subay sa gipaguwang abiso sa nasampit nga ahensya ang nawala nga usa ka motor banca naglawig sa kadagatan sa Davao Occidental nga kini ang ulahing nakita pasado alas Tres sa hapon sa bisinidad sa Sarangani, Davao Occidental.
Nasayran nga gikan sa dakbayan sa davao ang motor banca nga ginganlan og MBCA Amejara nga mibiya kini sa Sta. Ana Wharf niadtong Enero 17 ug gilauman unta nga moabot sa munisipalidad sa Governor Generoso,Davao Oriental sa Enero 19,2026 kon kagahapong adlawa.
Sa pagkakaron, gipa-alerto na ang tanang nagabyahe sa kadagatan ilabi na sa area sa Malita, Sta. Maria ug Don Marcelino lakip na sa Balut Island, Sarangani Island, Jose Abad Santos, North Jose Abad Santos ug kadagatan sa Governor Generoso, Davao Oriental nga mahimong magbinantayon sa palibot.
Kon adunay makita nga bangka nga naunlod, naglutaw-lutaw, o adunay timailhan sa aksidente sa dagat, makig-alayon gilayo sa labing duol nga munisipalidad / MDRRMO / Coast Guard Station Davao Occidental pinaagi sa numerong 0975-518-9735.
