Gikumpirma sa Korte Suprema nga ilaha na nga nadawat ang gisubmitar nga mosyon sa Kamara kalabot sa impeachment batok kang Bise Presidente Sara Duterte Carpio.
Pinaagi sa usa ka mensahe ni Spokesperson Atty. Camille Sue Mae Ting nga gipadala sa Bombo Radyo, iyahang giibutyag nga opisyal nang gidawat sa Labing taas nga Hukmanan ang maong dokumento.
Gipagawas usab karong adlawa ang kopya sa dokumento diin nakasulat ang hangyo nga baliktaron ang desisyon nga gihimo sa Korte Suprema.
Bisan pa man kini gisubmitar pinaagi sa electronic filing, matod ni Atty. Ting nga naghulat pa gihapon sila sa hard copy kay kini ang gi-require subay sa guidelines sa korte.
Sa laing bahin, gipadayag ni House Speaker Ferdinand Martin Romualdez ang iyang kabalaka sa desisyon sa Korte Suprema.
Matod niya, delikado ang gihimong lakang sa Korte Suprema bahin sa impeachment ug sa bag-ong guidelines nga ilahang gipagawas.
Apan iyang gipasabot nga ang pag-file sa Motion for Reconsideration dili aron mangahas o mangulo, apan aron mapalig-on ang balanse sa gahum sa matag sanga sa gobyerno.
Giklaro na daan ni Atty. Ting nga ang maong mosyon usa ka legal nga opsyon sa Kongreso aron irekonsidera ang desisyon sa Korte kalabot sa isyu sa impeachment.
Sa pagkakaron, nagpadayon ang protesta sa atubangan sa Supreme Court nga gihimo sa mga grupo sama sa Tindig Pilipinas, Nagkaisa Labor Coalition, ug ubang mga indibidwal.
Ilahang gipanawagan nga usabon sa Korte Suprema ang desisyon ug ipadayon ang impeachment trial batok kang Bise Presidente Sara Duterte.
Padayon sila nga mibarog nga ang desisyon sa pagdeklara nga ‘unconstitutional’ ang Articles of Impeachment nga gi-aprubahan sa Kamara, angay nga bawi-on o baliktaron.
