DAVAO CITY – Padayon pang gipanubayan karon sa kapulisan sa Monkayo, Davao de Oro kung unsa ang motibo ug kung si kinsa ang responsable sa pagpusil-patay sa usa ka pulis kagahapong adlawa sa National Highway, Brgy. Bamlag, Monkayo probinsya sa Davao de Oro.
Una nang giila ang biktima nga si Police Master Sergeant Rey Binalangbang, nakadestino sa Davao De Oro Police Provincial Office (Supply Section) ug residente sa Montevista. Nasayran nga duha ka lalaking nagsakay sa motor ang responsable sa pagpatay sa biktima.
Subay sa imbestigasyon sa kapulisan, gikan ang biktima sa Montevista ug paingon unta kini sa Monkayo. Apan pag-abot niini sa lugar sa nahitaboan, minaug ang pulis sa iyang gidrayban nga pick-up aron mangihi. Sa wa damha, kalit lamang mibutho ang duruha ka suspek nga nakamotor ug gilayong gipusil ang biktima sulod sa makadaghang higayon. Gisulayan pa og dala ang biktima sa Davao De Oro Provincial Hospital Montevista apan gideklara na kining Dead on Arrival sa doktor.
