DAVAO CITY – Gisubay na karon sa kapulisan kung si kinsa ang mipaluyo sa pagpusil patay sa usa ka Kagawad sa Purok Lasuerte, Brgy. Lapaz Carmen Davao del Norte kagahapong adlawa.
Nahitabo ang insidente sa provencial Road, Sitio Kabangcalan, Purok 5, Brgy. Sto. Niño sa nahisgutan nga lalawigan diin kalit na lamang nga gipusil sa wala mailhing suspetsado ang biktima nga nailang si Santos Sentelleas Samoranos, 65 anyos, minyo ug Barangay kagawad sa purok Lasuerte, Brgy. Lapaz.
Sa imbestigasyon sa kapulisan, sakay lamang sa iyang motorsiklo ang biktima gikan sa iyang panimalay paingon sa poblacion, Carmen, Davao Del Norte dihang gisundan kini sa duruha ka mga suspek ug gipusil sulod sa pipila ka higayon gamit ang wala matino nga klase sa armas nga maoy hinungdan sa iyang hinanali nga kamatayon.
Gisulayan pa pagdala sa Municipal Rescuer Ambulance ang biktima paingon sa Carmen District Hospital apan gideklara kining dead on arrival sa mga doktor. Padayon karon ang gilusad nga hot pursuit investigation sa otoridad.
