Gibasura sa Korte Suprema ang mosyon nga gisumite nila Sen. Bato Dela Rosa ug kanhing Pang. Rodrigo Roa Duterte kabahin sa giingong ‘arrest warrant’ nga gi-isyu sa International Criminal Court (ICC).
Sa En Banc Session sa Korte Suprema, wala niini gitugotan ang gipangayo sa petitioners sa ilang gihatag nga ‘Very Urgent Motion’ niadtong Nobyembre 12.
Gipangayo sa senador ug kanhing presidente nga manduan sa korte si Ombudsman Jesus Crispin “Boying” Remulla nga ipagawas o ipakita ang kopya sa ‘arrest warrant’ gikan sa International Criminal Court.
Kahinomdoman nga gipadayag ni Omb. Remulla nga nag-isyu na kuno ang ICC og warrant ug aduna siyay gihuptan nga kopya niini.
Tungod niini, gimanduan sa Korte Suprema ang Department of Justice, Department of Foreign Affairs, ug ubang respondents nga isubmitar ang ilahang komento sulod sa napulo ka adlaw kabahin sa laing ‘Very Urgent Manifestation’ sa mga petitioner.
Apan bisan paman niana, wala pa gihapon niaksyon ang Labing-Taas nga Hukmanan sa unang petisyon nila Sen. Bato ug kanhing Pres. Duterte kabahin sa kooperasyon sa gobyerno sa ICC.
Samtang sa laing bahin, hugot nga mipadayag si Ombudsman Jesus Crispin “Boying” Remulla nga adunay arrest warrant gikan sa International Criminal Court (ICC) batok kang Senador Ronald “Bato” Dela Rosa.
Gibutyag usab niya nga opisyal nga moabot ang warrant of arrest sa labing dali nga panahon.
Dugang pa ni Remulla, adunay siya’y kopya sa warrant of arrest batok kang Sen. Bato gikan sa ICC apan iyang giklaro nga kinahanglan pa gihapon hulaton sa Gobyerno ang opisyal nga pagpadala sa maong dokumento.
