DAVAO CITY – Naglaom ang Udenna Corporation, usa ka kompanya nga gipanag-iyahan sa business tycoon nga si Dennis Uy Jr., nga magkasugod na sila ug konstruksiyon sa labing una nga monorail project sa dakbayan sa mosunod nga tuig.
Sumala pa kang Engr. Manuel T. Jamonir, assistant vice president for Udenna Infrastructure Corporation, nga ang intra-city urban rail transport system nga giila sa tawag nga “Davao City Mover Project” ang mohatag sa mga pasahero ug komportable nga masakyan. Positibo ang nahisgutan nga kompanya nga ipadayon ang proyekto ilabi na nga ang ilang founder nga si Dennis Uy ngas usa sa mga campaign founders ni Pangulong Rodrigo Duterte sa milabay nga May 2016 presidential race, buot nga adunay “legacy project alang sa Davao” nga dakong tabang aron nga masolusyonan ang suliran sa trapiko sa siyudad.
Gikanayong ang sugyot nga 13-kilometer monorail, usa ka type monorail nga nagkantidad ug P80 billion nga magsugod sa Bangkal, latas sa MacArthur Highway ngadto na sa Bankerohan patuyok sa Magallanes Street, pasulod sa Claveria paingon sa usa ka dakong mall sa Lanang ning dakbayan. Gikanayong ang nahisgutan nga proyekto adunay 15 stations, diin maserbisyohan niini ang 100,000 riders ug laoman nga matapos kini sulod sa tulo ngadto na sa upat ka tuig. Sa higayon nga matapos, ang Davao maoy labing unang siyudad sa nasod nga magbaton ug monorail isip urban mass transit system, susama sa Singapore, Malaysia, Thailand, Japan, South Korea, China, US, ug Europe.
