Gikumpirma sa Department of Heath kon DOH nga nakatala na ang nasud og usa ka bag-ong kaso sa mpox kon monkeypox nga kini natala kagahapon.
Kini ang labing unang kaso karong tuiga rason nga mi-abot na sa 10 ang kinatibuk-ang kaso niini sa tibuok nasud.
Ang ulahing kaso sa monkey pox dinhi sa nasud, natala niadtong Disyembre 2023 diin ang tanang mga pasyente susamang nakarekober.
Ang bag-ong kaso, usa ka 33-anyos nga lalaki nga wala’y travel history gawas sa Pilipinas apan duna kini close contact, tulo ka semana ayha nga mitumaw ang mga simtomas.
Nagsugod pagtumaw ang mga simtomas kapin usa ka semana na ang nakalabay pinaagi sa kalintura ug paglabay sa upat ka mga adlaw, aduna kini rashes ang nawong, likod, tangkugo, kamot ug mga palad.
Wala usab gitumbok sa DOH ang tukmang lokasyon sa bag-ong kaso sa mpox apan natala kini sa usa ka government hospital diin gikolekta ang mga specimens gikan sa mga butoy-butoy sa panit ug gisusi gamit ang real-time polymerase chain reaction (PCR) test.
Sumala pa sa DOH, mutakod ang mpox sa tawo pinaagi sa close o kaha intimate contact gikan sa tawong infected niini o kaha mga gamit nga kontaminado niini sama sa mga sapot lakip na ang mga infected animals.
