DAVAO CITY – Gibutyag ni Col. Consolito Yecla, commander sa Task Force Davao (TFD) nga dakong tabang ang mga modernong ekipo nga gipahimutang karon sa Lasang Check point kini aron masiguro nga wala natakbuyan ug Corona virus disease ang mga motorista o pasahero nga mosulod dinhi sa dakbayan.
Una ng gipahimutang ang modernong thermal scanner sa Lasang checkpoint sa milabay nga adlaw diin personal kini nga gibisita ni Davao City Mayor Inday Sara Duterte.
Dali lamang ang proseso gumikan kay mo-agi lamang ang mga motorista ug masayran na ang temperatura niini.
Sa higayon nga adunay uban nga sintomas sa covid-19, dili una tugtan nga makagawas ang pasahero aron nga ipailalom pa kini sa lain nga test.
Gitambagan ni Yecla ang mga motorista nga kung aduna kini sintomas sa makamatay nga virus, mas maayo sumala pa nga dili na lamang kini mobiyahe.
Samtang gipasalig sab sa TF Davao nga samtang mopailalom sa maong proseso ang mga pasahero, ipatuman sab nila ang uban pang mga health protocols sama sa social distancing ug daghanan pa.
