DAVAO CITY – Gibutyag sa City Director, Colonel Alberto Lupaz nga subay sa imbestigasyon sa Traffic Enforcement Unit, usa ka Reverse Engineering kon RE Badja, Rickshaw ang modelo sa bao-bao nga gigamit sa suspek sa pagpanglugos-patay kay Vlanche Bragas duha na ka semana ang milabay sa Banana Plantation sa Calinan, ning dakbayan, gani ang nahisgotang ombak maong ginapanubayan sa kapulisan.
Matud pa ni Lupaz na dili pa kompirmado nga katong mga na-missing ning kasamtangan, suspek sa kamatayon ni Bragas.
Dugang butyag ni Lupaz nga dili pa usab kompirmado nga lima ka-mga indibdiwal ang nalambigit gumikan nga subay sa inisyal nga giingon sa usa ka witness, aduna daan usa ka pasahero ang sakay sa ombak ayha pa man nga nisakay si Bragas.
Giklaro usab sa maong opisyal nga walay kamatooran ang 4-million nga reward ngadto sa kung kinsa man ang makabutyag sa mga suspek luyo sa Bragas rape slay.
