DAVAO CITY – Malampuson ang nahitabong Mobile Vaccination Program sa Barangay Gatungan, Bunawan District ning Dakbayan sa Davao niadtong adlawng Sabado.
Mikabat sa 300 ka mga residente ang nabakunahan sa nahisgutang hugna sa mobile vaccination, ug silang tanan anaa sa A1 hangtod A5 priority groups.
Duha ka semana usab kining gi-andam gikan pa sa pagpalista hangtod na sa paghan-ay sa venue sa pagpamakuna.
Ang nahisgutang Barangay, sakop sa 2nd District sa Dakbayan, ug gipili usab kini sa mga 2nd District Councilors isip unang Barangay nga pahigayunan og mobile vaccination tungod 15 kilometros ang gilay-on niini sa sentro sa Dakbayan, ug gasto alang sa mga lumulupyo ang pag-adto sa sentro alang lang magpabakuna.
Mas gipakusgan usab ang Mobile Vaccination Program sa Dakbayan human nga nagmalampuson ang unang hugna niini sa Barangay Los Amigos.
Kahinumduman nga si Davao City Mayor Inday Sara Duterte Carpio ngadto sa Konseho nga magpahigayon ug mobile vaccination sa mga barangay.
Tumong sa maong programa nga adtuon ang mga lagyong dapit sa Dakbayan ug awhagon ang mga lumulupyo sa mga nahisgutang dapit nga magpabakuna na batok COVID-19.
Sa kasamtangan, padayon pa nga nagahan-ay ang 1st District Councilors kalabot sa pagpahigayon sa susamang programa sa ilang distrito.
