DAVAO CITY – Gilagdaan sa lokal nga panggamhanan ug sa Department of Finance ang memorandum of agreement nga mohatag ug 5.13 billion Japanese yen, o P2.38B alang sa katukuran sa waste-to-energy (WTE) facility project sa siyudad.
Sumala pa kang City Vice Mayor Bernard Al-ag nga ang WTE makonsidera na nga “go project” diin sugdan sumala pa ang konstruksiyon niini sa fourth quarter karong tuiga ug gikatakdang makompleto sulod sa tulo ngadto na sa upat ka tuig.
Sumala sa Bise Mayor nga andam na ang maong proyekto ilabi na nga aduna nay napalit nga luna alang sa WTE facility.
Gibarugan sab ni Al-ag nga bisan nagpadayag ang mga environmental groups sa ilang hugtanon nga pagbabag sa proyekto, ipadayon pa gihapon nila ang konstruksiyon ilabi na nga mipailalom kini sa legal nga proseso.
Gitataw sab ni Al-ag nga nagpasalamat sila sa Kitakyushu City sa Japan nga mi-assist sa pagbalhin sa teknolohiya dinhi sa siyudad.
