DAVAO CITY – Gipasakahan na ug kaso sa korte ang usa ka lalaki nga gikanayong misulay pagpatay sa iyang silingan sa Sitio Ogis, Barangay Eden Toril, ning dakbayan sa Davao.
Kasong frustrated murder ug concealment of the deadly weapon ang gipasaka batok sa suspek nga si Jerry Boy Ondot Tabialan, residente sa nahisgutan nga lugar.
Kasamtangan karon nga gibalhug si Tabialan sa Toril Police Station.
Adunay nakitang lig-on nga basehan si Prosecutor Imee Bisera-Mabale aron pasakahan ug kaso si Tabialan pinasikad sa reklamo nga giduso ni Dennis Galagate ug sa mga Toril police officers.
Subay sa affidavit ni Galagate, samtang nakighinabi siya sa usa ka Jose Remoreran sa basketball court kalit nga miduol ang suspek nga lango sa ilimnong makahubog ug gisinggitan sumala pa sila ug gipangutana kung asa ang iyang anak ug asawa.
Gisulayan sumala pa suspek pagbunal si Galagate gamit ang tubo apan napugngan kini si Remoreran. Nangayo gilayon ug assistance si Galagate sa Toril Police Station ug dihang miresponde ang kapulisan, nakuha sab sa posisyon sa suspek ang usa ka kutsilyo.
Giresolba gilayon ang kaso human nga wala gidawat ni Tabialan ang iyang katungod nga mopailalom sa preliminary investigation ug wala sab nag-execute ug waiver.
