Arestado ang usa ka construction worker human masakpi sa checkpoint nga misuway og pasulod og iligal nga droga sa Davao City.
Gipangunahan sa Task Force Davao (TFD) ug Davao City Police Office (DCPO) ang checkpoint operation sa Sirawan Entry Point, diin nasikop si alyas “Rhodireck,” 46-anyos, minyo, ug residente sa Sta. Cruz, Davao del Sur.
Base sa inisyal nga imbestigasyon, gikan sa Digos City ang suspek ug paingon unta sa Davao City sakay sa motorsiklo.
Nadakpan kini nga adunay dala nga upat (4) ka heat-sealed transparent plastic sachets nga adunay sulod nga gituohang shabu.
Ang tibuok timbang niini mitakdo sa 11.18 gramos, nga gibana-banaang nagkantidad og ₱83,850.00.
Sa pagkakaron, nakakustodiya na sa Toril Police Station 8 (PS8) ang maong suspek samtang nagpadayon ang imbestigasyon ug legal nga proseso batok sa iyang kalapasan.
