DAVAO CITY – Misaka na ngadto sa 444 ka mga indibidwal ang apektado sa outbreak sa diarrhea sa Barangay Tulalian Santo Tomas Davao del Norte.
Sumala sa Municipal Health Office (MHO) posibleng madungagan pa ang nahisgutan nga ihap sanglit wala pa nahilakip niini ang mga apektadong pasyente nga natala kagahapong adlawa.
Sa kasamtangan duha na sab ang natalang namatay samtang pipila ang nagpabilin pa gihapon sa balay tambalanan.
Samtang mikabat sumala pa sa 99 ka mga pasyente ang gipailalom sa RT-PCR swab ug migula sa resulta nga tulo sa mga nahisgutan ang nagpositibo sa Covid-19 samtang sa 17 ka mga pasyente nga gipailalom sa rectal swab, 8 niini ang nagpositibo sa cholera.
Sa kasamtangan, wala nay nadugang pa nga indibidwal ang gi-admit sa hospital.
Gilayon sab dayon nga gi-isolate ang tulo ka mga pasyente diin sa nahisgutan nga ihap, usa niini ang symptomatic samtang duruha ang asymptomatic.
