DAVAO CITY – Diha-diha nga nabugtu-an sa iyang kinabuhi ang usa ka Angelito Andopena Valencia, alyas Boboy, 30 anyos, residente sa Carmelite road, Bajada, ning dakbayan sa Davao human pusila sa wala pa maila nga suspetsado alas 6:45 ang takna niining milabay nga gabii.
Nasuta sa pasiuna nga imbestigasyon sa Sasa PNP nga samtang nakig-inum ang nahisgutan nga biktima, uban ang usa ka alyas Dodong, ug iyang igsuon nga usa ka Jubert Antopiya Valencia, 40 anyos ang pangidaron sa RG Redilla Compound, sa nahisgutan nga dapit.
Nasayran nga misulod ang suspek ug mipalit ug ilimnon, diin tua sab didto ang grupo sa kalalakin-an, hinongdan nga pipila ka minute lamang ang milabay, nakadungog ang igsuon sa biktima nga usa ka Jubert Valencia ug upat ka sunod-sunod nga boto sa armas human posila ang iyang igsuon.
Nakahi-agum ug tulo ka mga samad pinosilan ang nahisgutan nga biktima sa iyang ulo, dughan ug kamot nga mao ang hinongdan sa iyang hinanali nga kamatayon.
Gisulayan pa ang biktima sa pagdala sa balay tambalanan apan wala na matabang pa sa mga doctor gumikan sa kagrabe sa mga samad niini.
Dali sab nga miikyas ang suspek, sama sa usa ka motorsiklo nga wala’y plate number. Gihulagway sa igsuon sa biktima ang suspek nga dunay gitas-on nga 5’5”, dunay niwangon nga panglawas, nga naka-jacket ug itom ug sakay sa motorsiklo nga Honda XRM nga wala’y plate number. Sa kasamtangan ang kapolisan sa Sasa naningkamot nga madakpan ang suspek sa krimin, aron nga masayran kung unsa ang motibo sa krimin.
