DAVAO CITY – Gibutyag ni House Speaker Pantaleon Alvarez nga ang una ug ikaduhang hugna sa Mindanao Railway System laoman nga makompleto sulod sa unom ka tuig ni Pangulong Rodrigo Duterte, diin ang konstrusiyon sumala pa sa Phase1 magsugod sayo sa mosunod nga tuig.
Matud pa kang Alvarez, pundohan sa gobyerno ang acquisition sa right-of-way samtang ang uban niini pundohan pinaagi sa official development assistance.
Nasayran nga ang Mindanao Railway project sugdan sa Tagum City sa Davao del Norte, Davao City ug Digos sa Davao del Sur.
Ang 102-km. nga magsilbing first phase sa proyekto adunay rota nga magsugod sa Tagum City latas sa dakbayan sa Davao ug paingon sa Digos City diin mobalor kini ug P35.91 billion.
Samtang ang Phase 2 mokonekta gikan sa Tagum City paingon sa Butuan City.
Tumong sa railway nga mokonekta sa tanan nga mga key areas sa isla sa Mindanao sama sa Cagayan de Oro, Iligan, Zamboanga, Butuan, Surigao, General Santos, ug Davao.
