DAVAO CITY – Molampus si Pangulong Rodrigo Duterte sa pagpatuman sa uban pa nga mga programa ug proyekto atol sa nahabilin nga tulo ka tuig sa iyang pagpangatungdanan isip pangulo sa nasod.
Kini ang nahimong panlantaw ni Dr. Adrian Tamayo, spokesman Mindanao Development Authority (MinDA) kinsa namahayag nga pinaagi kini sa tinguha ni Pangulong Duterte nga maduso ang national land use plan nga daku sumala pa ug ikatabang aron nga masuta ang mga dapit sa nasod nga dunay katakus alang sa usa ka matang sa negosyo.
Pinaagi sa pagpalig-on sa kahimtang nga pabor sa negosyo mas molig-on ang dagan sa ekonomiya ug panginabuhi-an sa katawhan pinaagi sa makolekta nga revenue.
Makita dinhi ang usa ka direksyon sa paglambo sa nasod.
Tataw sumala pa nga mapatuman gayud kini ni Pangulong Rodrigo Duterte.
Sa kinatibuk-an nasod pa gihapon ang mabulahan sa nahisgutan nga kalambo-an.
