DAVAO CITY – Padayon ang awhag sa mga militanteng pundok ngadto sa kagamhanan ni Pangulong Rodrigo Duterte sa pagpadayon sa panaghinabing pangkalinaw, bisan kung daw lisod na nga subling ikapatuman ang unilateral ceasefire.
Kalakip sa ilang panawagan ang pagbuhi sa mga giilang prisoners of war, labi na sila si PFC Irwin Galan, PFC Samuel Garay, ug PFC Sulayman nga mao ang kasamtangan nga bihag sa mga rebeldeng NPA.
Samtang pinasikad sab sa pahayag sa NDFP nga gibasa ni Bishop Modesto Villasanta gipasalig sa NDFP nga pangbuhi-an nila sa dili madugay ang nahisgutan nga mga POW isip pagpakita sab sa ilang tinguha nga kabuhi-an ang mga kaubanan nga mga political prisoners ug sa pagpadayon sa panaghinabing pangkalinaw.
Tinguha sab karon sa mga peace advocate nga molusad ug mga peace rally nga sugdan karong Pebrero 27 nga dinunghan nga ipahigayon sa dese sais ka mga siudad ug kalungsuran sa Mindanao.
Traynta mil ka mga Mindanawan ang gilauman nga motambong sa nahisgutan nga peace rally isip tipik sa pagdani sa GRP ug NDFP nga subling mobalik sa peace negotiating table.
