DAVAO CITY – Mikabat sumala pa sa 18 mil ka mga pamilya sa walo ka mga lugar sa lalawigan sa Davao del Norte ang naapektohan sa nasinatiang halapad nga pagbaha sa lugar sa milabay nga adlaw.
Una ng gibutyag ni Glenda Delideli, head sa Davao del Norte Provincial Disaster Risk Reduction and Management Office (PDRRMO), anaa sa 17,438 ka mga pamilya nga gilangkuban sa 85,160 ka mga indibidwal gikan sa 37 ka mga barangay sa munisipalidad sa Kapalong, Carment, Dujali, Asuncion, Sto. Tomas, Talaingod, ug New Corella ang naapektohan.
Sa mga gipahikling o gipahimutang sa mga evacuation center, anaa sa   1,869 ka mga pamilya ang natala gikan sa 10 barangay sa Kapalong, Asuncion, Sto. Tomas, Carmen, ug New Corella. Kahinumduman nga una ng gibutyag sa  PDRRMO nga daghanang mga dapit sa Davao del Norte ang flood-prone areas hinungdan nga gilayon nilang nasinatian ang mga halapad nga mga pagbaha sa higayon nga mubundak ang kusog nga pag-ulan.
Sa kasamtangan, mihubas na ang baha sa mga apektadong lugar samtang nakabalkik na sab ang mga residente sa ilang tagsa-tagsa ka mga panimalay.
Samtang sa area sa Tagum, gikanayon ni Tagum City Information Officer Edwin Lasquite nga pipila sa mga lugar nga apektado ang gilangkuban sa Busaon, Bincungan, Canocotan, Cuambogan, San Miguel, Pagsabangan, ug Mankilam.
Una ng nagpahimangno ang Pag-asa nga kanunay magbinantayon ilabi na sa mga dapit nga sagad baha-on sanglit makasinate pa gihapon ug mga pag-ulan ang Davao region sa umaabot pa nga mga adlaw.
