DAVAO CITY – Anaa na sa 2,427 ka mga kaso ang napasang-at sa Davao City Police Office batok sa 50,693 ka mga nagmasinupakon sa health ug safety protocols sa pagpatuman sa General Community Quarantine with Heightened Restrictions.
Subay sa ulahing datos sa DCPO gikan Hulyo 16 hangtod Setyembre 28 ning kasamtangang tuig, miabot sa 185 liquor ban violators ang nadakpan, 8,040 ang nasikop sa curfew, ug 12,918 ang nakalapas sa social distancing o mass gathering.
Apil usab sa gikasuhan ang 3,630 ka mga wala naggamit og motorcycle protective barriers.
Pagsupak sa Republic Act Act 11332, kon Mandatory Reporting of Notifiable Diseases and Health Events of Public Health Concern Act ang kaatubangon sa mga nagmasinupakon, sumala ni DCPO Chief Police Colonel Kirby John Kraft.
Gawas sa mga gipasakaan og kaso, anaa usab 16,384 ka mga indibidwal ang gipanghatagan og citation tickets tungot sa wala pagsul-ob og face mask, samtang 13,166 ang sa wala pagsuot og face shields, ug 37 alang sa non-essential travel.
