DAVAO CITY – Midagsa na sa Davao City Overland Transport Terminal (DCOTT) ang mga katawhan nga manguli ngadto sa mga lalawigan alang sa Semana Santa.
Sumala kang Aisa Yusof, Manager sa DCOTT nga niining adlawa misaka ug singko hangtud sa dies porsiento ang gidaghanon sa mga pasahero sa terminal.
Una na nga gipahayag ni Yusof nga dili angayan nga mabalaka ang mga pasahero sa DCOTT gumikan kay bastante ug dili magkulang ang mga bus nga mobiyahe padulong sa mga lalawigan, labi na atol sa holy week.
Kini human sa pagsusi sa mga bus company ug mga operators atol sa Semana Santa.
Dugang pa ni Yusof nga dili kabalak-an ang pagdagsang sa mga pasahero gumikan kay sumala pa kang Yusof kung puno na ang usa ka bus molarga dayon kini bisan kung wala pa mo-abot ang ilang gitakda nga oras sa pagbiyahe o interval time.
Dili sab hulaton nga mapuno ang bus gumikan kay molarga sab dayon kini pag-abot sa interval time. Gipasabot ni Aisa Yusof nga dunay mga bus company nga mobiyahe bisan sa Biernes Santo, gawas lamang sa Yellow Bus ug Metro Shuttle Bus.
Nasayran nga sa regular nga mga adlaw dunay 700 hangtud sa 750 ka mga bus ang nagabiyahe sa DECOTT, apan atol sa holiday, sama sa semana Santa moabot ngadto sa usa ka libo ka mga biyahe sa mga bus ang ikatala.
Pabilin nga gihugtan ang seguridad sa sulod ug sa gawas sa Davao City Overland Transport Terrminal pinaagi sa Task Force Davao ug sa kapolisan.
