Gipahamtangan og lifetime ban ug multa nga ₱200,000 si Gensan Warriors player Michole Sorela human niyang gisumbag si Mindoro Tamaraws player Jonas Tibayan atol sa 1xBet-MPBL 2025 Season game niadtong nakalabayng gabii, Agosto 11, sa Batangas City Coliseum.
Nahitabo ang maong insidente sa ikatulong quarter pagkahuman sa free throw ni Bambam Gamalinda, sa dihang kalit lamang nagpalupad og kinumo si Sorela nga mitugpa sa panga ni Tibayan.
Nakaangkon kini og hilabihang kadaot lakip na ang concussion, broken jaw, busted lip, ug fractured shoulder, diin nagbilin pa kini og dugo sa playing court.
Gilayon sab kining gitabang sa medical team si Tibayan ug gibalhin dayon sa stretcher aron madala sa duol nga ospital.
Nagpabilin nga madaugon ang Mindoro Tamaraws sa score nga 76-72, nga mipataas sa ilang rekord ngadto sa 13-10 sa 30-team tournament.
Hugot kining gikondena ni MPBL Commissioner Kenneth Duremdes, nga misulti nga dili tolerable ang maong pamatasan sa liga.