DAVAO CITY – Gitataw sa Bureau of Mines and Geo-Sciences Bureau (MGB) nga gi-aksyunan na niini ang suliran sa pagmina sa Diwalwal, Monkayo, Compostela Valley Province.
Kini ang reaksyon sa ahensya human mahilakip sa State of the Nation Address (SONA) ni Pangulong Rodrigo Duterte ang pagkadaut sa kinaiyahan sa Monkayo gumikan sa mga pagmina sa Mount Diwalwal.
Sumala pa kang Eng. Noel Angeles, Chairperson sa City Mining Industry nga duna na sila’y gimugna nga Provincial Task Force aron nga mao ang motutok sa operation batok sa mga iresponsabli nga mga pagmina.
Dugang pa kang Angeles nga duna na’y plano ang Department of Environment and Natural Resources (DENR) ug ang Environment Management Bureau (EMB) ug ingon man ang MGB aron hingpit na nga kalikayan ang pagkadaut sa kinaiyahan sa padayon nga pagmina.
Sa datus sa MGB nasayran nga dunay 27 ka mga mining areas sa region eleven ug giimbestigahan na sa pagkakaron aron nga masayran kung mituman ba kini sa responsabli nga pagmina.
Kung nakasupak ang mga nahisgutan sa balaod paserhan kini sa MGB.
