DAVAO CITY – Mihatag ang lokal nga kagamhanan ug katin-awan nga tugtan pa gihapon ang mga tawo nga wala mipailalom sa anti-Covid-19 vaccine nga makasulod sa Roxas Night Market sa higayon nga ablihan na kini sa Marso 24. Gikanayong ang taas nga percentage rate sa mga fully vaccinated Dabawenyos ang makahatag ug igong proteksiyon sa mga dili bakunado nga muadto sa night market.
Una na matud pa nga mihangyo ang Roxas Night Market team sa petsa ingon man igong panahon alang sa reopening gumikan kay magpahigayon sila ug raffle alang sa slots, orientation sa vendors, marking ug delineation. Ang nahisgutan nga team ang gilangkuban sa mga opisyal sa City Treasurer’s Office.
Una na sab nga gibutyag ni Paul Bermejo, head sa Ancillary Services Unit nga nagpadayon karon ang ilang pagpangandam alang sa subli nga pag-abli sa night market.
Gikanayong daw balik sa sinugdanan ang Night Market operation human nga gipasirad-an kini sulod na sa taas-taas nga panahon sukad nga nagsugod ang Covid-19 pandemic.
Bisan nga ipatuman ang no restriction policy, angayan pa gihapon nga mutamod ang mga musulod sa Roxas Night Market sa mga polisiya ilabi na ang pasuot ug facemask.
Nagpadayon sab karon ang panawagan sa lokal nga kagamhanan sa publiko nga mas maayong magpabakuna na arun nga mas makaangkon ug dugang pa nga proteksiyon sa kaugalingon batok sa kagaw.
