DAVAO CITY – Gipahimangnoan sa Davao City Police Office (DCPO) ang mga sakop sa volunteer police auxiliary nga kinahanglan magbinantayon human ang gidangatan sa usa nila ka miyembro sa Toril nga gidunggab.
Matud pa kang Sr. Insp. Maria Teresita Gaspan, tigpamaba sa DCPO, kinahanglan nila nga i-adopt ang buddy system sa pagpatuman sa balaud sa siyudad.
Kahinumduman nga luwas na ang kahimtang sa usa ka Norberto Ferrera, 39 anyos, usa ka police auxiliary nga nadestino sa Toril Police Precinct, human kini nadala sa Southern Philippines Medical Center.
Sa kasamtangan, gisubay pa karon sa Toril police ang pagkatao sa mga suspek.
Nasayran sa Davao City Police Office (DCPO) nga aduna silay 900 volunteer police auxiliary sa 12 ka mga police precincts sa siyudad.
Nakaangkon ug samad dinunggaban si Ferrera human gi-atake sa duruha ka mga kalalakin-an sa Barangay Daliao, Toril District.
Pauli na sa ilang panimalay ang biktima sa San Vicente, Daliao dihang nahitabo ang insidente.
Apan pag-abot niini sa junction paingon sa Vales Beach Resort ug barangay main road, nakita sa biktima ang duruha ka mga wala mailhing lalaki nga katahapan ang lihok ug nagtindog daplin sa dalan.
Dihang iya kining giduol, kalit na lamang siya nga gi-atake ug gidunggab.
Nakaangkon ug samad dinunggaban sa iyang tuo nga dughan ug bukton nga bahin ang biktima nga daling gidala sa balay tambalanan samtang paspas sab nga misibat ang mga suspek sa wala matino nga direksiyon.
