Gitugotan sa prosekusyon ang hangyo sa mga respondents sa reklamo nga gisang-at sa Securities and Exchange Commission ngadto sa Department of Justice batok sa pamilya Villar ug sa ilang kompanya.
Sa unang preliminary investigation, nagdesisyon ang panel sa mga piskal nga hatagan pa og dugang panahon ang mga respondents aron makasumite sa ilang counter-affidavits.
Una nang nangayo og 15 ka adlaw nga extension ang ilang mga abogado, apan gipalawig kini sa prosekusyon ngadto sa labaw sa usa ka bulan.
Sumala ni Peter Ong, usa sa mga gikonsidera sa panel mao ang nalalapit nga Holy Week. Busa gitakda ang sunod nga preliminary investigation sa Abril 20.
Gihangyo usab ni Ong ang mga respondents nga personal nga manumpa sa ilang counter-affidavits atubangan sa panel sa mga piskal, imbis nga sa ubang piskal o notary public.
Lakip sa mga giireklamo ang Villar Land Holdings Corporation, Manuel Villar Jr., Cynthia Villar, Camille Villar ug Mark Villar.
Nag-atubang sila og mga reklamong market manipulation, insider trading, ug misleading disclosures.
