DAVAO CITY – Mukabat sa 300 ka mga Persons of Indonesian Descents (PIDs) ang hingpit na nga na-isyuhan sa ilang Indonesian travel documents human ang pipila ka tuig nga nagpabilin sa Mindanao.
Mapasalamaton sila sa 68 anyos nga diplomatic relations tali sa Pilipinas ug Indonesia nga maoy dalan nga mahatagan sila ug nationality.
Gipangunahan mismo ni Indonesian Foreign Affairs Minister Retno Marsudi ang distribution ug passports sa 300 PIDs sa House of Indonesia dinhi sa dakbayan sa Davao.
Tipik lamang sab kini human ang malampuson nga registration nga gipangunahan sa United Nations High Commissioners for Refugees (UNHCR).
Nasayran nga sagad sa mga Indonesian ang nanimuyo sa Balut Island sa Davao Occidental ug didto na nagbaton ug pamilya.
Nasayran kang Marsudi nga gikan sa 8,745 ka mga gi-proseso atol sa registration, 2,425 niini ang nakumpirma nga Indonesians.
Gitumbok sab sa opisyal ang kamahinungdanon sa pagbaton ug nationality aron nga dili mabutang sa risgo ang ilang kinabuhi gumikan kay sayod sila kung si kinsa ang mohatag kanila ug proteksiyon.
Nagpasalamat sab si Marsudi kang Pangulong Rodrigo Duterte gumikan kay natapos ang nahisgutan nga proseso.
