DAVAO CITY – Mibati ug kalisang ug na-trauma ang mga trabahante sa Sumitomo Fruit Corporation (SUMIFRU) ug Tri-Star Highland Company nga mga banana plantations ug ang mga residente sa Barangay Manuel Gianga, Tugbok District, ning dakbayan sa Davao human mahitabo ang pinakaulahi nga pagpanghasi sa mga rebeldeng New People’s Army (NPA).
Kahinumduman nga gipangrapido, gipangsunog ug gipanghulog sa pangpang ang tulo ka mga truck sa mga plantasyon sa saging sa Barangay Manuel Giangga, Tugbok District niadtong Sabado sa kaadlawon.
Sumala sa kasundalohan ubos sa 3rd Infantry Battalion Philippine Army gipugngan sa mga rebelde ang mga spray truck, diin duha niini ang sa kompanya nga SUMIFRU, samtang ang usa iya sa Tri-Star Highland Company.
Sumala sa kasundalohan, pinasikad sa saysay sa mga driver gidala sa Sitio Tigon, Barangay Tamayong, Calinan District ang mga truck ug didto gipa-arakan sa ilang armas, gisunog ug gihulog sa pangpang.
Sa pagkakaron, mihimo na ug clearing operation ang kasundalohan sa lugar.
Hugtanon nga gikondena sa tropa sa kagamhanan ang nahisgutan nga dinautan nga binuhatan sa mga NPA.
