DAVAO CITY – Hingpit na karon nga gi-ablihan sa lalawigan sa Santa Cruz Davao del Sur ang tanan nila nga mga tourism sites alang sa mga buot mobisita human nga gipailalom na ang lugar sa alert level 2 classification.
Sumala pa kang Julius Paner, tourism officer sa Sta. Cruz nga kalakip sa ilang gi-ablihan karon ang duruha ka sites nga gilangkuban sa Bamboo Peak sa Barangay Jose Rizal ug Tomari Falls sa Sibulan.
Ang Bamboo Peak usa ka trekking site ug nag-unang hiking attraction sa North Sta. Cruz District.
Samtang ang Tomari Falls ang usa sa ginadayo nga busay nga nahimutang sa Sibulan, Sta. Cruz.
Abli na sab ang uban pa nga mga tourist attractions sa Sta. Cruz nga abli na sab sa mga turista ang gilangkuban sa Mt. Apo, Bagobo Cultural Village, Passig Islet, Water Tubing sa Sibulan River, Mt. Dinor sa Sinoron, Pilan River sa Sinoron, Tacub Laya Falls sa Sinoron, Mt. Loay, ug Saliducon Cave.
Subay sa gipagulang guidelines, ang lugar nga gipailalom sa alert level system sa Inter-Agency Task Force (IATF) for the management of emerging infectious diseases mao kadtong mga areas nga adunay ubos nga transmission sa covid-19 o adunay pag-ubos sa kaso.
