DAVAO CITY – Gitan-aw nang daan sa mga dunay mga pwesto sa NCCC mall nga daku kayo ang ilang kalugi human sa pagkasunog sa mall niadtong Desyembre 23.
Kini mismo ang gibutyag sa pet shop nga Pet Ko diin nanga-apil ug kasunog ang mga imported nga mga iro ug iring.
Sumala pa kang Flor Caminade, area head sa Pet Ko, duha ka iro ug duha ka iring lamang ang naluwas sa mga bombero, hinungdan nga milyones ka pesos ang ilang nahimong pagkalugi.
Nakahimo na sa pagbanabana ang mga tenants sa NCCC mall human sila tugti sa kadumalahan sa mall ug sa Inter-agency Anti-Arson Task Force ang pagsulod sa gambalay aron nga ma-recover ang mga nahabilin nga paninda ug kwarta sa ground floor ug second floor.
Higpit sab ang mga securitry guard sa mall nga dili basta-basta nga mupasulod ug mga tenants sa establisamento kung wala’y dala nga sulat gikan sa kadumalahan sa NCCC, sumala sa guardya nga agi kini ug paglikay nga dunay mawala nga mga butang sa mall.
Sa kasamtangan, mga tenants lamang sa ground floor ug second floor ang gitugtan nga makasulod sa mall gumikan kay ang third ug fourth floor mao ang gilamoy sa sunog ug nahugno na.
