DAVAO CITY – Sama sa pagdayo sa mga supporter ni Mayor Sara Duterte sa Sofitel sa Pasay City niadtong Sabado, naglinya sa gawas Magsaysay Park ning Dakbayan sa Davao ang mga supporter ni Davao City Mayor Inday Sara Duterte aron magdagkot og kandila dala na ang pag-ampo.
Ang nasangpit nga grupo gikan sa Inday Sara for President Movement-Davao City Chapter, diin ang mga miyembro niini nanukad pa dinhi sa Dakbayan sa Davao ug sa Island Garden City of Samal.
Subay sa campaign color sa Alkalde, green usab ang color sa kandila nga ilang gipangdagkot.
Tumong nila nga matandog pa ang kasingkasing ug mausab pa ang huna-huna sa Mayora aron mu-file kini og COC isip Presidente.
Kahinumduman usab nga niadtong Biyernes lang, natapos ang siyam ka adlaw nga novena alang sa susamang tumong.
Adunay mga hugna niini nga gipahigayon sa St. Jude Thaddeus Parish ug sa Sacred Heart of Jesus ning Dakbayan, ug sa lain pang mga dapit sa nasud.
Nagatuo sila nga samtang dili pa muabot ang deadline sa COC filing karong Biyernes ug sa substitution sa Nobyembre 15, daghan pa ang posibleng mahitabo, sama na lang sa sorpresang pagduso ni Senador Bong Go og COC isip VP ug ang pag-atras ni Presidente Rodrigo Duterte sa pagpapili sa susamang posisyon.
Ilang gibarugan ang kasabutan sa mga Duterte nga usa lang kanila ang mudagan sa nasudnong katungdanan.
