DAVAO CITY – Gikumpirma sa Department of Social Welfare and Development XI nga mukabat na sa 279,605 ka mga senior citizen sa rehiyon ang nakadawat na sa ilang social pension alang sa ikaduhang kwarter niining tuig kasamtangan.
Ang maong ihap ang tugbang sa 98.21% nga turnout gikan sa kinatibuk-ang ihap sa mga benepisyaryo sa Davao Region nga anaa sa 284,700. Kahinumduman nga ang pagpatuman sa Social Pension program sa panggamhanan ang subay na usab sa Republic Act 9994 o Expanded Seniors Citizens Act of 2010 diin adunay pagadawaton nga ayuda ang mga katigulangan o mga senior citizen.
Alang sa second quarter karong tuiga, ang mga benepisyaryo ang nakadawat og nagkantidad sa P1,500 alang kana sa tulo ka bulan gikan Abril hangtud Hunyo.
Una na kining gitagana sa gobyerno alang sa mga indigent senior citizen diin anaa sa kinatibuk-ang P419,407,500 ang nadisburse alang sa ikaduha nga kwarter.
BY BOMBO ALLIANNE SILAO
