Nagpasalamat si Davao City Police Office (DCPO) Director Police Colonel Mannan Muarip sa tanang Dabawenyo tungod sa kooperasyon ug disiplina nga gipakita atol sa malinawon nga pagsaulog sa Undas 2025.
Sa eksklusibong pakighinabi, gipahibalo ni Col. Muarip nga nahimong “zero incident” ang tanang sementeryo sa syudad kalabot sa walo ka focus crimes sama sa pagpanulis, pagpangawat, physical injury, ug uban pa.
Gipamatud-an sa opisyal nga base sa record sa DCPO gikan alas-6 sa buntag sa Oktubre 31 hangtod alas-6 sa buntag sa Nobyembre 2, 2025, walay naitalang krimen sa mga pampubliko ug pribadong sementeryo.
Tungod niini, nagpahayag sa pagpasalamat si Col. Muarip sa katawhan sa Davao City tungod sa ilang pagsunod sa mga lagda ug balaod, lakip na ang pagdili sa pagdala sa mga armas, pag-inom sa sulod sa sementeryo, ug ang pagpakita sa respeto sa mga nagbisita sa ilang mga minahal sa kinabuhi.
Gipasalig usab sa DCPO nga padayon ang heightened security measures bisan tapos sa Undas aron mapadayon ang kalinaw ug kahapsay sa tibuok siyudad.
