Gipasiugda ni Atty. Rameses Victorious Villagonzalo nga dili makausab sa merito sa impeachment case batok kang Vice President Sara Duterte ang mga nakit-ang sayop sa pipila ka dokumento, sama sa mga typographical errors sa ngalan, numero, o mga letra.
Sumala pa sa abogado, kon ordinaryo nga criminal case ang gihisgutan, mahimong gamiton sa depensa ang maong mga sayop aron mapuslan alang sa ilang panig. Apan, matod niya, tungod kay impeachment case ang giatubang, ang maong mga sayop maisip lamang nga harmless errors ug dili makapakunhod sa kabug-at sa kaso.
Dugang pa niini, gipasiugda ni Villagonzalo nga ang kinauyokan sa impeachment trial mao ang pagtino kon tinuod ba nga nagpahimulos og hulga si Vice President Sara Duterte batok kang Pangulong Ferdinand Marcos Jr. atol sa maong news conference, ug dili ang gagmayng sayop sa mga dokumento.
Lakip sa iyang gipasiugda nga ang gagmayng sayop sa teknikalidad sa mga dokumento dili igo aron mausab ang dagan sa impeachment trial, tungod kay ang nag-unang isyu sa kaso mao gihapon ang gituohang hulga nga gisusi sa korte. Sa pagkakaron, nagpadayon ang impeachment proceedings samtang gipadayag sa mga legal expert ang ilang nagkalain-laing pagtuki sa mga isyung gitun-an sa Senado.
