Gikatakdang isubasta sa Bureau of Customs (BOC) ang pito sa 13 ka mga sakyanan nga gipanag-iya sa magtiayong kontratista nga sila si Pacifico “Curlee” ug Cezarah Discaya.
Sumala ni Customs spokesperson Chris Bendijo, nagsumite og voluntary forfeiture ang mga Discaya ug wala na nila tuyoang iapela ang pagkumpiska sa pito sa 13 ka mga sakyanan nga kasamtangang anaa sa kustodiya sa BOC.
Ang maong pito ka sakyanan walay bisan unsang rekord sa import entry o certificates of payment. Lakip niini ang mga Rolls-Royce Cullinan, Bentley Bentayga, Mercedes-Benz G63 ug G500, Lincoln Navigator L, Toyota Tundra, ug Toyota Sequoia.
Itakda ang subasta sa Nobyembre 15, ug walay plano ang ahensya nga i-livestream ang kalihokan.
Samtang ang nahibilin nga unom ka sakyanan adunay mga import documents, apan kuwestiyonable ang ilahang payment records.
Tungod niini, nagsumite ang mga Discaya og “position paper” aron supakon ang seizure order sa BOC.
