Nahilakip sa ginadudahan sa mga sakop sa Compostela Municipal Police Station ang anggulo sumala pa nga usa lamang matud pa ka inside job ang nahitabong pagpanulis sa usa ka empleayado sa bangko, diin gikamatay kini sa usa ka security guard gumikan sa pag sulay pa niinig depensa aron nga dili makawat ang kwarta sa mga tulisan kagahapon adlawa, sa Brgy. Poblacion, Compostela, Davao De Oro.
Sumala pa ni PLt.Col. Jesswer Vagilidad, ang labaw sa Compostela MPS, nga nahilakip matud pa sa ilahang ginaimbita aron nga imbestigahan ang pipila ka mga concerned individuals aron nga masayran gayud ang tinuod nga detalye sa panghitabo, lakip na sab ang gikaingong inside job.
Sigon pa niini, nga makita sa maong CCTV nga kalit lamang miguwa ang duha ka mga tulisan, human nga nabantayan na niining pasulod na sa sakyanan ang usa ka empleyado sa bangko, bitbit ang dakong kantidad sa kwarta, rason nga gisulayan pa og babag sa maong on duty nga gwardia, hinungdan nga gipusil kini sa mga suspetsado, kansang maoy nagdeklara sab nga holdup.
Sa pagkakarun, padayon gihapon ang ginalusad nga hot pursuit operation sa mga otoridad, aron nga hingpit nang madakpan ang mga nahisgutan.
Gisiguro sab sa mga sakop sa Compostela MPS nga usa sab matud pa kini ka isolated case, diin ginakonsidera kining mamahimong leksyon ang maong insidente aron nga mas mapakusgan pa ang operasyon sa kapulisan.
Samtang, hustisya sab ang padayong singgit sa mga kabanay sa maong mitaliwan nga security guard.
