DAVAO CITY – Nagtoo karon ang mga nanag-iya ug restaurant dinhi sa dakbayan sa Davao nga aduna nay mamahimong kabag-ohan sa siyudad ug dili na ipailalom sa mas istrikto nga community quarantine classification ilabi na nga nagkaduol na ang Holiday Season.
Sumala pa kang Restaurant Owners Association of Davao City, Inc. (RestoDC) president Benjamin Lizada nga dungan sa pagpaningkamut sa lokal nga kagamhanan, makabangon na sab ang mga restaurant sector nga usa sa mga naapektohan sa covid-19 pandemic.
Sa milabay nga semana dihang gipailalom na ang siyudad saalert level 3 diin gitugtan na ang mga business establishments kalakip na ang mga restaurants nga adunay Safety Seal Certificate nga maka-operate ug 40 percent.
Gipasalig sa RestoDC nga padayon sila nga makiglambigit sa lokal nga kagamhanan sa pagpatuman sa protocols ug guidelines sa Inter-Agency Task Force (IATF) sa tanan nga mga restaurants sa dakbayan.
Magpahigayon sab sumala pa ang maong grupo ug inspeksiyon sa mga restaurants aron masiguro nga compliance kini sa IATF guidelines.
Nakamugna na sab sumala pa sila ug Restaurant Sector Covid-19 Code of Conduct diin tumong niini nga mapatuman ang tukma nga lakang nga mogiya sa operasyon sa restaurant sector sa siyudad ilabi na kadtong padayon nga nag-abli luyo sa nasinatian nga Covid-19 pandemic.
