Nangreklamo na ang mga residente sa pipila ka bahin sa Matina Aplaya ilabi na sa Seaside ug San Juan sa nasampit nga Barangay tungod sa walay tarong nga agas sa tubig sukad pa niadtong pagsaulog sa pasko hangtod karong panahuna.
Nasayran nga dugay na gimulo sa mga residente ang kahinay ug walay agas sa tubig ilabi na sa adlaw, apan karong panahuna mas nakahatod na kini ug kahasol ngadto kanila.
Sumala pa sa mga residente nga dako na ug epekto kini sa ilahang pagpuyo sanglit ang tubig sa usa sa labing mahinungdanon nga magamit sa panaimalay.
Tungod sa walay tarong nga agas sa tubig, wala na kalaba ang pipila ka mga residente ug ingon man wala na kaligo sulod sa pipila ka mga adlaw tungod sa walay tarong nga agas.
Gikwestyon karon sa mga residente sa Seaside Matina Aplaya, (dapit sa Badjawan) ang kagamay lamang sa tubo sa linya sa tubig nga kaniadto pa nga gimuntar nga gamay pa ang namuyo sa maong lugar kung itandi karong panahuna nga anaa sa kapin usa ka libo ang mga panimalay.
Ning panahuna, samot nga nakahatod ug problema sa mga residente ang walay klaro nga agas sa tubig tungod sa pagbalik sa eskwela sa mga bata.
Nanghinaot ang mga namuyo sa maong lugar nga adunay makatabang ngadto kanila nga maresolba ang problema sa hinay ngadto na sa walay agas sa tubig sa ilahang lugar.
