DAVAO CITY – Gibutyag ni Riza Gumban Carino, Davao de Oro Correspondent ngadto sa Bombo Radyo Davao nga nakadawat na og hinabang ang mga residente nga naapektuhan sa duha ka sagunson nga linog nga mitay-og sa probinsya kaniadtong Marso 7, ning tuig.
Dugang pa niya, pipila na usab ka mga residente ang mibalik na sa ilahang mga tagsa-tagsang panimalay.
Kahinomdoman nga anaa na sa 20 ka mga modular tents ang nahatag sa Nabunturan, 500 Family Food Packs sa Andap, New Bataan ug 500 usab ka mga Family Food Packs ang nahatag na gikan sa Provincial Social Welfare and Development Office.
Kahinomdoman usab nga una nang gibutyag sa tigpamaba ni Vice President Sara Duterte nga si Atty. Reynold Munsayac ngadto sa Bombo Radyo Davao nga niduaw kagahapon, Marso 9, ning tuig ang Office of the Vice President (OVP) sa Maragusan ug New Bataan, Davao de Oro aron personal na maghatag og kapin libo ka mga relief packs alang sa mga apektado sa linog.
Tumong sa moang lakang sa OVP ang makatabang atol sa bisan unsa pang mga katalagman sa pagmugna ni VP Inday Sara og Disaster Operation Center ilawom sa mga sattelite offices sa OVP sa tibuok nasud.
Kahinomdoman nga gitay-og sa 5.9 magnitude nga linog ang probinsya sa Davao de Oro diin natala ang episentro sa linog sa gilay-ong 8 kilometers sa habagatang-sidlakan sa munisipalidad sa New Bataan, Davao De Oro.
