DAVAO CITY – Gikanayon ni Police Major Marvin Hugos, Chief of Police sa Paquibato District ning dakbayan nga walay natalang casualty sa nahitabong landslide sa Sitio Pungko, Brgy Salapawan, Paquibato district kagahapon kini human nga nakamatikod na ang mga residente nga posibleng adunay masinatian nga pagdahili sa yuta.
Sumala kang Hugos nga ayha pa man nahitabo ang landslide nakadungog ang mga residente nga daw adunay miboto sa ibabaw nga bahin hinungdan nga nakadesisyon sila nga mohikling.
Kahinumduman nga anaa sa pito ka mga balay ang apektado sa pagdahili sa yuta human nga natabunan kini.
Nagpahimangno na lamang ang opisyal sa mga residente sa lugar ug uban pang dapit sa paquibato partikular na sa mga nanimuyo sa landslide prone areas nga pabiling alerto aron nga dili mabutang sa risgo ang kinabuhi ilabi na nga adunay nasinatian usab karon nga mga pag-ulan nga posibleng hinungdan sa paghumok sa yuta.
