Davao City – Upat ka mga regional offices sa Department of Health ang nagkahiusa aron nga mohatud ug serbisyo sa Surigao City human ang pag-igo sa kusog nga linog sa milabay nga semana.
Matud pa kang Dr. Abdullah Dumama Jr., DOH assistant secretary for Mindanao, nagpadala ang DOH Caraga ug 400 ka mga personahe, samtang ang DOH Northern Mindanao ang nagpadala usab ug mga personahe nga maoy mopahigayon ug rapid health assessment. Ang DOH VIII (Eastern Visayas) nagpahimutang ug water filter systems ug accessories (sama sa chlorine) aron limpiyohan ang mga gi-rasyon nga tubig gikan sa local fire department.
Nanguna sab ang Region XI sa pagpakiglambigit sa regional offices pinaagi sa ilang Office for Field Implementation and Management nga magsilbing center of communication.
Nasayran sab kang Dumama nga unom ka mga biktima nga samaran ang gidala sa Davao Region diin upat niini ang anaa sa Davao Regional Hospital (DRH) sa Tagum, samtang ang duruha na-confine sa Southern Philippines Medical Center (SPMC) ning dakbayan sa Davao.
