DAVAO CITY – Gilauman nga daghanan ug makat-unan ang mga rebel returnees nga mga lumad nga gibiyahe kaganinang buntag sakay sa C130 Cargo Plane padulong sa kaulohan.
Sila ang unang batch sa mga rebel returnee nga mobisita sa Malacanang ug makigsalo sumala pa kang Pangulong Rodrigo Duterte sa panihapon.
Una nang gipahayag ni Eastern Mindanao Command Spokesman Major Ezra Balagtey nga ang 217 ka mga rebel returnee tipik sa 683 ka mga kanhi membro sa NPA nga gipresenta niadtong Desyembre 21, 2017 sa EMC.
Alas 9:00 kaganinang buntag dihang milupad ang eroplano nga gisakyan sa mga kanhi mga rebeldi gikan sa Tactical Operation Group XI, Sasa, Panacan, Davao City.
Tipik kini sa biyahe sa mga rebel returnee isip educational tour sa Intramuros, Malacanang ug uban pa nga mga historic places aron nga pukawon ang ilang pagka-nasyunalismo.
Pinaagi sa pakig-alayon sa TESDA, ipakita kanila ang mushroom production ug uban pa nga mga kaumahan sa Bulacan aron nga matabangan sila nga makakuha ug ideya unsa-on sa pagpalambo ang ilang panginabuhi-an.
Ang nahisgutan nga biyahe libre ug wala’y gastuhon bisan usa ka sentimo ang mga rebel returnee.
