DAVAO CITY – Nagkadaghan na ang mga PUJ drivers sa Davao City nga nahatagan og ayuda gikan sa lokal nga panggamhanan sa dakbayan.
Sumala sa datos sa City Social Welfare and Development Office, nasa 1,862 ka mga drayber ang gilaumang mahatagan og food packs gawas sa 464 ka mga drayber nga nakadawat kaniadtong Pebrero 16.
Sumala sa buhatan, sila ang mga drayber nga wala pa nakadawat sa financial assistance sa DSWD sa miaging tuig.
Nagpadayon ang pagpangapud-apud sa mga ayuda hangtud karong adlawa sa DCRC Compound sa may Almendras Gym, Quimpo Boulevard, ning dakbayan gikan alas 8:00 sa buntag hangtud alas 5:00 sa hapon.
Bisitaha lamang ang Facebook page sa CSWDO Davao City alang sa mga pangalan sa nga drayber nga nahilakip sa Batch 12 nga makadawat sa food packs.
Gawas sa distribution sa food packs, nahitabo sab ang consultation ug onsite registration alang sa mga drayber nga buot musalmot sa High Priority Bus System kon HPBS.
Sumala pa ni Richard Villanueva, Social Developmennt Program Head sa HPBS Project, adunay nagpaabot nga mga benepisyo alang sa mga drayber nga buot makapahimulos sa proyekto sama sa training ug livelihood package lakip na scholarships alang sa ilang mga anak.
Abli gihapon ang registration sa HPBS sa ilang opisina nga nahimutang sa Magsaysay Park, Davao City.
via || Bombo LJF
