DAVAO CITY – Ipatuman gilayon ang gipagulang Executive Order (EO) No. 60 Series of 2021 ni Davao City Acting Mayor Sebastian Duterte nga bugtong ang Southern Philippines Medical Center (SPMC) na lamang nga balay tambalanan sa siyudad ang mo-cater ug kumpirmadong kaso sa Covid-19 patients.
Mas maayo sumala pa ang nahisgutan nga lakang kini aron dali na lamang nga masubay kung pila ang kaso sa mga natakdan ug kagaw sa dakbayan dungan sa nagpadayon nga pag-ubos sa kaso niini karung panahona.
Nagpasabot sumala pa kini nga balik na normal ang operasyon sa mga private hospital diin mamahimo na kini nga modawat ug mga non-covid cases.
Samtang gibutyag ni Covid-19 Task Force Spokesperson Dr. Michelle Schlosser, nga dili na sab ipadayon ang home isolation ug ang tanan ng mga pasyente nga adunay mild symptoms o asymptomatic ang dad-on sa temporary treatment and monitoring facilities (TTMF) sa siyudad.
Una ng gipatuman ang home isolation sa siyudad human nga napuno na ug mga Covid-19 patients sa nakalabay nga mga bulan.
