Nakita sa Presidential Anti-Organized Crime Commission (PAOCC) nga usa sa mga rason sa padayong operasyon sa mga gagmay nga Philippine Offshore Gaming Operations (POGOs) mao ang kapakyas sa pagdakop sa pipila ka mga boss sa POGO nga nagpuyo sulod sa nasud.
Sumala pa ni PAOCC Executive Director Usec. Gilbert Cruz, nga daghan pa gihapon ang mga players, mga trabahante sa POGO, ug mga bosses sa POGO nga wala pa madakpi hangtod karon, mao sumala pa kini ang nag-unang rason nganong ang pipila ka POGO hubs nagpahigayon gihapon og gagmay nga operasyon.
Pipila sa nabantayan sa mga otoridad mao ang mga resort diin nahimutang ang daghang POGO hubs, condo units sa Pasay nga gihimong POGO centers, ug bisan ang underground parking wala na kalikayi.
Ang ubang makita nga rason sa padayong operasyon sa mga POGO mao ang pagkabaton sa maayong tinubdan sa mga ekipo, bisan ang mga armas susama sa pusil nakuha na sa mga operator.
Matud pa niini nga mao kini ang timailhan nga nahibaw-an na usab sa mga operator kung unsa ang giingon nga mga kahuyang sa mga awtoridad nga nagpahigayon og raid operations.
Dugang pa nga ang POGO hubs aduna usab mga nindot nga sakyanan nga maoy pruweba nga nakadawat kini og taas nga kalidad gikan sa ilang nag-unang tinubdan.
Samtang, mapasalamaton si Cruz nga wala na didto ang pipila sa mga dagkong illegal POGO hubs sa nasud ug magpadayon kini nga mupahigayon og raid aron masubay ang mga small-scale POGO operators nga kasamtangang nagatago-tago.
