DAVAO CITY – Padayon nga nakatala karon ang pamunoan sa Davao International ug mga pasahero nga nagapresenta ug peke nga mga RT-PCR test.
Una ng gibutyag ni City Tourism Operation Office (CTOO) head Generose Tecson nga halos matag semana aduna silay matala nga mga nagapameke sa ilang RT-PCR test results luyo sa kanunay nila nga pahimangno nga dili buhaton ang nahisgutan nga lakang.
Gani ubay-ubay sumala pa sa ilang mga nadakpan ang nagpositibo sa covid-19 butang nga buot likayan sa siyudad aron nga dili makasulod sa dakbayan ang bisan unsa man nga variant sa Covid-19.
Una ng nasayran nga sukad Nobyembre 2020 hangtud Agosto 22 ning kasamtangan nga tuig, mikabat na sa 161 ang ilang naduso nga kaso.
Tulo niini ang na-inquest na; 14 ang regular filing; 2 ka mga minor de edad ang kalakip sa mga nadakpan o adunay kinatibuk-ang 180 ka mga nasikop.
Anaa sab sumala pa sa 12 sa mga nasikop ang nagpositibo samtang 10 ang mga unipormed personnel.
Tungod niini, subling nanawagan ang opisyal nga dili mosulay sa susama nga lakang gumikan kay dili magpanuko ang otoridad nga pasakahan ug kaso ang mga nahisgutan. Mas modako sab sumala pa ang bayaran sa mga madakpan gumikan sa ipahamtangan nga mga multa.
