DAVAO CITY – Gibutyag sa Department of Migrant Workers XI officer in charge Marie Rose Escalada nga misaka og 200% ang gidaghanon sa mga Overseas Filipino Workers sa Davao Region alang sa first quarter ning kasamtangang tuig kung itandi sa samang panahon ning nakalabay nga tuig basi sa datus gikan sa PSA.
Sumala sa opisyal, daghanan niini nga naggikan sa kabus nga pamilya apan daghan gihapon ang naggikan usab sa mga adunahan nga pamilya.
Gumikan niini, dako ang nahatag niini nga epekto sa economiya aspect dinhi sa dakbayan ug nagkataas ang money remittances sa dolyar.
Samtang sa pikas bahin, gibutyag usab sa DMW ang mga problema karun nga ginaatubang sa ilang buhatan, gumikan dinhi sa dakbayan duna matud pay mga taho kabahin niining mga recruitment agencies nga wala narehistro sa DMW.
Apan duna na usab silay mga nadakpan ug napasira nga mga agencies nationwide samtang dinhi sa Davao duna pay tulo ka mga recruitment agencies nga under monitoring sa ahensya.
Gibutyag usab ni Overseas Workers Welfare Administration XI Officer In charge Gina Mae Quimora nga dunay natala ang maong buhatan nga mukabat sa 1000 ngadto sa 1,200 ka mga OFW ang natahong gi-abuso sa mga amo niini matag tuig.
Samtang anaa sa mga napulo ngadto sa baynte ka mga distress workers ang nagareklamo kanila matag adlaw.
Busa nagpahimangno ang ahensya ngadto sa mga buot manarbaho sa langyaw nga kanasuran nga dapat nasayod kini sa tukmang proseso aron malikayan ang mga nanghitak nga illegal recruitment agencies.
